როგორ გადავურჩეთ დიქტატურას - გზამკვლევი

მიხეილ ჩარკვიანის „როგორ გადავურჩეთ დიქტატურას“ არის დოკუმენტური ტექსტი პოეზიის და პროზის მიჯნაზე, რომელიც საქართველოში მიმდინარე რეპრესიების ფონზე დაიწერა. ის მკითხველს მოსალოდნელი დიქტატურის და მასში ცხოვრების სირთულეების შესახებ აფრთხილებს. მასში თავმოყრილია მსოფლიოს ისტორიული გამოცდილება, რეჟიმის წინააღმდეგ მებრძოლ ადამიანთა ცოდნა და სამომავლო პერსპექტივა, თუ რა ელის მოქალაქეს, რომელიც ბრძოლაში დანებდება.

დიქტატურა და მისი გამანადგურებელი ბუნება ავტორს ყოველდღიურ ცხოვრებამდე, მის რუტინულ ელემენტებამდე დაჰყავს. ის ამტკიცებს, რომ ჩაგვრა და უსამართლობა შეეხება ყველას, მიუხედავად იმისა, რამდენად მორჩილი იქნება ადამიანი; მიუხედავად იმისა, დაუჭერს თუ არა მხარს რეჟიმს; მიუხედავად იმისა, აირჩევს თუ არა პოლიტიკური პროცესების მიღმა ყოფნას - მხოლოდ საკუთარი ცხოვრებით შემოფარგვლას. ეს არის გზამკვლევი ადამიანისთვის, რომელიც იბრძვის, რომელსაც სჯერა, რომელიც ხედავს მომავალს და მზადაა თავი გასწიროს იმისთვის, რისიც სწამს.

ერთი შეხედვით, ეს ტექსტი ნიჰილიზმს, შიშს და უიმედობას თესავს, თუმცა ის მკითხველს არ აგუებს კრიზისულ მდგომარეობას, პირიქით, ასწავლის მას, როგორ გადარჩეს მაშინ და იქ, სადაც გარემო იმდენად აბსურდული ხდება, რომ თითქოს ბრძოლას ძალა და მნიშვნელობა დაკარგული აქვს.

რა შეიძლება ასეთ ვითარებაში გახდეს ბიძგი გადასარჩენად? როგორ უნდა დაუპირისპირდე სისტემას, რომელიც შენზე გაცილებით ძლიერია? როდის ჩათვლი, რომ დამარცხდი? - თუ მომავლის შესახებ მტკივნეული შეკითხვების დასასმელად მზად ხართ, ეს ტექსტი მოკლედ და მკაფიოდ გიპასუხებთ - როგორ გადავურჩეთ დიქტატურას.