შენ

გიორგი დუნდუას ნამუშევრები თვალის პირველი შევლებისთანავე აუხსნელი მაგნიტიზმით გიზიდავს. აბსტრაქტული ნამუშევარი, თავისი არსით, ამოუწურავია. ის ყოველ ჯერზე ახალი აღმოჩენის შესაძლებლობას გაძლევს. მხატვრის თვითგამოხატვის ფორმა საოცრად პოეტურია. მკითხველთან საურთიერთობოდ ის არაორდინალურ გზას ირჩევს: ქმნის ჩარჩოს მისი პოეტური სათაურებით და თავისუფლების უსაზღვრო სივრცეს ამ ჩარჩოს შიგნით. ასეთი ხერხის წყალობით კიდევ უფრო დიდი სიღრმით წარმოჩინდება ექსპრესია და იზრდება ფორმის უკან დამალული ფილოსოფიური საზრისის აღქმის შესაძლებლობა. 
ამ პუბლიკაციაში შესული ნამუშევრების დიდი ნაწილი განადგურდა მხატვრის სახლოსნოში გაჩენილი ხანძრის დროს 2023 წლის გაზაფხულზე.
ხანძარგამოვლილი ნამუშევრების გაცოცხლებით მხატვარი გამთლიანებისა და სილამაზის უკვდავყოფის
შესაშურ მაგალითს გვაძლევს. ეს კრებული ცოცხალი მანიფესტაციაა სიცოცხლის დანიშნულების: არსებულისა და აღარარსებულის შერწყმის იდეით ჩვენი მოგზაურობიდან მხატვარს ისეთ სულიერ სიმაღლეზე ავყავართ, სადაც წითელი მზეების გამარჯვება გარდაუვალია. ამ სულიერ სიმაღლეზე „გამოგონილ სიხარულს ფერადი დარდები“ აქვს. ამიტომ, აქ შეგიძლია „დათვალო შენი მოგონებები და სიმშვიდით დაიწყო ზმორება.“ აქ არავინ დაგიშლის, „წვიმიან სურვილებს თავზე ხელი გადაუსვა“ და „ნიჟარაში ჩატეული ამბავი მოყვე.“ აქ შეგიძლია მშვიდად ისმინო „სამუდამო მგზავრის ნაბიჯების ხმა.“ ამ სულიერ სიმაღლეზე განცდილი დანაკარგით გამოწვეული მრისხანება ფერების მსგავსად გრადაციას განიცდის და, საბოლოოდ, საკუთარი სისავსის, სამყაროსთან უწყვეტი კავშირისა და საკუთარი სიმართლის აღმოჩენის შესაძლებლობას ქმნის. აქ ზუსტად იცი, როგორი ხარ სინამდვილეში. აქედან „ჩამოხვალ ყველა ფსონს, როცა გიყვარს.“ 
ქეთევან ირემაშვილი

დაიბადა 03.11.1977 თბილისში, საქართველო, დაოჯახებული, ყავს მეუღლე და ორი შვილი. 1992 - 1994 მ.თოიძის სახ. სამხატვრო ლიცეუმი. 1994 - 2000 თბილისის სახელმწიფო სამხატვრო აკადემია. 
2000 - 2002 ფოტოგრაფი სხვადასხვა ჟურნალ გაზეთების. 2002 წლიდან ფრილანსერი მხატვარი და ფოტოგრაფი გერმანიასა და საქართველოში.