ორნამენტთერაპია

ქასო, იგივე ნინო ქასოშვილი თანამედროვე ქართველი გრაფიკოს-დიზაინერია. უძველესი ქართული ორნამენტების შთაგონებით შექმნა გასაფერადებელი ორნამენტების სერია (სულ 16 ორნამენტი), რითაც გააცოცხლა სიმბოლოების ხატვით მკურნალობა-თერაპიის არქაული ტრადიცია. ამიტომაც დაერქვა ამ წიგნს შესაბამისი სახელი - ,,ორნამენტთერაპია“.
ნინო ქასოშვილის თერაპიული ორნამენტები თავისთავადი და უნიკალურია - თითოეულში გამოყენებულია რომელიღაც ფრაგმენტი ქართული ტრადიციული ორნამენტებიდან, მაგრამ მთლიანობაში წარმოადგენს ახალ, უნიკალურ, საავტორო ვერსიას.
პირველი ორნამენტები ჯერ კიდევ პალეოლითის ადამიანმა შექმნა. მისი გეომეტრიული სტილისტიკა პირდაპირ იმეორებს მანდალას კონცეფციას: ესაა - სამყაროს მოწყობისა და მისი ფენომენების სიმბოლურ-გრაფიკული, სქემატური ,,თხრობა“. უძველესი მკურნალები და შამანები სამკურნალო პროცედურების დროს, ხშირად მიმართავდნენ ,,მანდალთერაპიას“ - მანდალების ქვიშაზე ხატვისას, პაციენტი გადაჰყავდათ ,,საწყის დროში“(In Ilo Tempore), როცა ჯერ კიდევ არაფერი არსებობდა, არც სამყარო, არც სნეულებანი, არც თავად ეს ადამიანი და ,,იქედან“ აბრუნებდნენ მას ,,ახალშობილ“ ჯანსაღ, ,,მთლიან ადამიანად“ – Homo Totus-ად.
მკურნალობისა და თერაპიის იმავე პრინციპს ეფუძნება ორნამენტის ხატვა-გაფერადების იდეაც. მასში, ისევე როგორც მანდალაში კონცენტრირებულია სამყაროს საწყისების სასიცოცხლო ენერგიები, რომელსაც ეზიარება და იღებს შემსრულებელი. ამიტომაც წინამდებარე წიგნი - ,,ორნამენტთერაპია“ აგრძელებს მანდალებითა და ორნამენტებით მკურნალობისა და თერაპიის უძველეს ტრადიციასა და პრაქტიკას.
,,ორნამენტთერაპიის“ წიგნი აგებულია ორმაგი სტრუქტურის პრინციპით - მასზე მუშაობა შესაძლებელია ორივე მხრიდან - ,,ღია ფერების სივრციდან“ და ,,მუქი ფერების სივრციდან“, რაც საშუალებას იძლევა ერთი და იგივე ორნამენტი გააფერადოთ ორჯერ - ღია და მუქ ფერებში. ესაა წიგნის თერაპიული პრინციპი, რომელიც ემსახურება გამფერადებლის შინაგან სამყაროში გარესამყაროს დუალურ პოლარობებთან ფერებითა და სიმბოლოებით ცნობიერ-არაცნობიერი კავშირების დამყარებას, ამ გზით კი მათ გაცნობიერებასა და გამთლიანებას, საბოლოოდ, შინაგანი ბალანსის, ჰარმონიული მთლიანობის მიღწევას - Homo Totus-ის მდგომარეობაში გადასვლას.
ინსტრუქციაინსტრუქცია
ორნამენტების გაფერადება შეგიძლია დაიწყოთ წიგნის ნებისმიერი მხრიდან და ადგილიდან. 16 ორნამენტის ბოლოს თერაპიული მიზნით დართულია თითოეული ორნამენტისთვის განკუთვნილი ,,თერაპიული ჩანაწერების სივრცე“, სადაც თქვენ შეგიძლიათ ჩაიწეროთ ყველა ის ემოცია და ფიქრი, რომელიც კონკრეტული ორნამენტის გაფერადებისას თქვენში დაიბადება.
ხათუნა თავდგირიძე