Vita Contemplativa

ეს წიგნი მკითხველს შეიძლება უჩვეულო და ორიგინალურ ნაწარმოებად მოეჩვენოს, მაგრამ ეს ასე ნამდვილად არაა. წინამდებარე საუბრები საკმაოდ, შეიძლება ითქვას, რადიკალური აზრითაც კი, ტრადიციულია. საქმე ისაა, რომ ავტორს ფილოსოფია ესმის, როგორც ჭვრეტითი ცხოვრების წესი, რომელიც ამა თუ იმ სახით ყველა ტრადიციულ კულტურაში არსებობს, ერთადერთი გამონაკლისი - ესაა ე.წ. თანამედროვე გნოსტიკური მატერიალიზმის ცივილიზაცია, რომელსაც ხშირად „მოდერნულ დასავლურ კულტურას“ უწოდებენ. ფილოსოფია, როგორც ჭვრეტითი ცხოვრება, გულისხმობს გარკვეულ სულიერ (შინაგან) გამოცდილებას. ეს გამოცდილება შეიძლება იყოს პიროვნული, ტრანსპერსონალური, ანონიმური, მაგრამ ნებისმიერ შემთხვევაში არსებობს მისი გამოწვევისა (პროვოცირების) და გადაცემის გზები. ფილოსოფია ამ გამოცდილების პროვოცირებისა და გადაცემის ერთ-ერთი (მაგრამ - არა ერთადერთი) საშუალებაა. ამ წიგნში, მნიშვნელოვანი ადგილი უკავია შინაგანი სულიერი გამოცდილების გაგებასა და წვდომას, განსაკუთრებით კი - ქრისტიანულ კონტექსტში. ამავე დროს, აქვე მოცემულია გარკვეული ტიპოლოგიზაციის ცდაც - კერძოდ, თუ რით განსხვავდება ქრისტიანულ ქრონოტოპოსში შინაგანი სულიერი გამოცდილება სხვა სულიერი ტრადიციებისაგან.