მისნის სიმღერა

პოლ ლინჩი ხუთი რომანის ავტორია. მისი ბოლო რომანი, „მისნის სიმღერა“, 2023 წელს ბუკერის პრემიით დაჯილ- დოვდა. უფრო ადრე, ლინჩმა მიიღო კერი გრუპის პრიზი წლის ირლანდიური რომანისთვის და საფრანგეთის ჯილდო საუკეთესო უცხოური რომანისთვის. გარდა ამისა, პოლ ლინჩი მრავალი საერთაშორისო კონკურსის ფინალის- ტია, მათ შორის უოლტერ სკოტის ჯილდოს (დიდი ბრიტანეთი), ევროპული სტრეგას (იტალია), საფრანგეთის საუკეთესო უცხოური წიგნისა და ჟან მონეს პრემიის მფლობელი. 2024 წელს ლინჩი აირჩიეს ესდანას – ირლანდიის ხელოვნების აკადემიის წევრად, რომელშიც გაერთიანებულნი არიან გამორჩეული ხელოვანები. მისი რომანები თარგმნილია 30-ზე მეტ ენაზე. პოლ ლინჩის რომანი „მისნის სიმღერა“ ასახავს ერთი ოჯახის ბრძოლას გადარჩენისთვის, როცა სახელმწიფოში ტოტალიტარიზმი მყარდება. სწორედ ბუკერის ჯილდოს მფლობელი ამ რომანით ვიწყებთ „ინტელექტის” ახალ სერიას „21-ე საუკუნის პრემირებული წიგნები”. ავტორის თქმით, წიგნის მთავარ ინსპირაციად იქცა სირიის სამოქალაქო ომი, ლტოლვილთა კრიზისი და დასავლეთის გულგრილობა ლტოლვილთა მდგომარეობისადმი. რომანში მოქმედება ირლანდიაში ვითარდება. ქვეყანა ტირანიისკენ მიბრუნებული მთავრობის ხელშია და ეილიშ სტეკს მხოლოდ ის შეუძლია, უმწეოდ უყუროს, როგორ ქრება მისი ნაცნობი სამყარო, როგორ ეშლება ოჯახი სახელმწიფოს დამხობის თანმდევი მოვლენებით. ეილიშის ამბის მაგალითზე მკითხველი ხედავს რეპრესიებისთვის, ომისთვის გადახდილ ადამიანურ ფასს, ხედავს ზარალს, დანაკარგს, ტკივილს. ჯერ მისი ქმარი უჩინარდება, შემდეგ მისი უფროსი ვაჟი. არსებობისთვის ბრძოლა ეხება წვრილმანებსაც: უნდა იშოვოს საკმარისი რძე ბავშვისთვის, მოუაროს ქალაქის მეორე ბოლოში მცხოვრებ მეხსიერებადაკარგულ მამას, შეეგუოს სამსახურიდან დათხოვას. ჩვენ ვხედავთ, რამდენად უსუსურია ცივილიზებული ფენის მოქმედება, მაგრამ ამასთანავე მტკიცეა მათი მომავლისადმი რწმენა. რატომ ფიქრობდა ამდენი ადამიანი, რომ ყველაფერი მალე მოგვარდებოდა, რატომ არ ცდილობდნენ სამშობლოდან ადრევე გაქცევას?