მახათი, "არასერიოზული თამაში."

მახათი არის ძალიან მარტივი ქართული სამაგიდო თამაში, რომელიც საშუალებას გაძლევთ ფრთები შეასხათ საკუთარ იუმორს და სახალისო გახადოთ ნებისმიერი შეკრება. ყოველ რაუნდში ერთი მოთამაშე კითხულობს შავ კარტს, რაზეც ყველა სხვა მოთამაშე პასუხობს თეთრი კარტით. დანარჩენი კი წარმოსახვის ამბავია...

ყველა ურიგდება 10 თეთრი კარტი. თამაშს იწყებს უხუცესი და ხდება კარტის უსტაბაში. იგი იღებს შავ კარტს და კითხულობს ხმამაღლა. ამის შემდეგ ყველა ირჩევს სასურველ ვარიანტს თეთრი კარტებიდან და აძლევს ფარულად უსტაბაშს, რომელიც ჩეხავს კარტს, კითხულობს ყველა ვარიანტს და ირჩევს საუკეთესოს. მოცემული წინადადება (შავი კარტი) გადაეცემა რაუნდის გამარჯვებულს. თამაში მიმდინარეობს 7 ქულამდე ან სანამ სითხე არ დაგესხმებათ კარტზე. თუ მოთამაშე ფიქრობს, რომ მის ხელთ არსებული კარტები სისულელეა, არაფერში არგია და ამბობს მსგავს ფრაზებს: "ვერაფრეს ვერ ვსვამ", "ეს მამაძაღლობები ვინ მოიფიქრა" და ა.შ., მას შეუძლია გამოიყენოს 1 ქულა (თუ მოახერხა და აქვს) და გამოცვალოს 10-ვე თეთრი კარტი. ყოველი რაუნდის შემდეგ თითოეული მოთამაშე (უსტაბაშის გარდა) იმატებს თეთრ კარტს. ყოველ მოთამაშეს მუდმივად 10 თეთრი კარტი უნდა ეჭიროს. 

დამატებითი წესი

მრავალფეროვნებისთვის თამაშში შეგიძლიათ დაამატოთ ფიქტიური მოთამაშე-ბალთაზარ ბალთაზარაშვილი, მას ჩვეულებრივად დაურიგდება 10 კარტი და ყოველ რაუნდში მიიღებს მონაწილეობას შემთხვევითი კარტის ჩამოსვლით. თუკი ბალთაზარი 1 რაუნს მაინც მოიგებს, თამაში მომენტალურად წყდება, ყველანი სახლებში მიდიხართ და მთელი ღამე ჭერს უყურებთ იმაზე ფიქრით, რომ ვიღაც ჯანდაბა ბალთაზარმა იუმორში გაჯობათ.