ცოტაც და ბევრი ვიქნები შენთვის

ასე იცის სიყვარულმა:
სადღაც მაინც მოკვდება, 
უხმოდ და უსახელოდ,
შენ კი ცოცხალს დაგტოვებს -

გაყურებინოს მთელი სიკვდილი. 

რადგან ერთხელაც, 
როცა სიცარიელის ჯალათები 
კედელთან მიგაყენებენ, 
ჩახმახებს შემართავენ და ერთდროულად მილიონი თოფი გაისვრის, 
ყველაზე მეტად ის ტყვია გეტკინოს, რომელიც არ გავარდება. 

არ მოჰყვა ჩემ გულს ინსტრუქცია, 
დავუშვი სიყვარული და მოვკვდი.                                            

გურამ ჯახუტაშვილი, პოეტი, მთარგმნელი, დაიბადა 1983 წელს თბილისში, დაამთავრა თბილისის სახელმწიფო უნივერსიტეტი, წერს ადრეული ასაკიდან, მისი პოეზია და თარგმანები (გოეთე, ჰაინე, რილკე, დიკენსონი, ფროსტი, კიპლინგი, ბროდსკი) 1998 წლიდან იბეჭდება სხვადასხვა გამოცემებში. "ცოტაც და ბევრი ვიქნები შენთვის" ავტორის მესამე პოეტური კრებულია, სადაც ახალ ნამუშევრებთან ერთად შესულია ზოგიერთი ლექსი წინა ორი გამოცემიდან. გურამ ჯახუტაშვილი თანამედროვეობის უდავოდ გამორჩეული ავტორია, მის პირველ კრებულზე წლების წინ წერდა თამაზ ჭილაძე, რომ "სხვა ახალგაზრდა ნამდვილი მწერლების წიგნებივით, დღევანდელ ტოპოგრაფიულ წარღვნაში, აშკარად გამოირჩევა იმით, რომ მემკვიდრეობითობის გრძნობა ახლავს, ანუ ტრადიციებიდან ამოზრდილი სიახლე ახასიათებსო", დღეს კი შეგვიძლია ვთქვათ, რომ იმ "ნამდვილმა მწერალმა" უკვე შექმნა ქართული თანამედროვე  პოეზიის განსხვავებული ფორმა, რომელიც შინაარსობრივად და პოეტურად თანაბრად ძლიერია, მრავალფეროვანია და ქართულია.                       

კოკა კორინთელი