1924 წლის აჯანყება: საქართველოს და დემოკრატიული სოციალიზმის დაბადება

1924 წლის ეროვნული აჯანყების 100 წლისთავთან დაკავშირებით გამომცემლობა „ზიარი“ გთავაზობთ ერიკ ლის ახალ წიგნს „1924 წლის აგვისტოს აჯანყება - საქართველო და დემოკრატიული სოციალიზმის დაბადება“. 

წიგნში დიდი ადგილი ეთმობა 1921-1924 წლების პერიოდს, აღწერილია ბოლშევიკთა ქმედებები და ქართველი ხალხის წინააღმდეგობა, რომელიც წინ უძღოდა აჯანყებას. ასევე განხილულია საქართველოს დაპყრობის თაობაზე ევროპელი სოციალ-დემოკრატების პოზიცია, განსაკუთრებით იმ დელეგაციის წევრებისა, რომლებიც 1920 წელს ესტუმრნენ საქართველოს. 

ავტორი მკითხველს აცნობს 1924 წლის ეროვნული აჯანყებისა და, განსაკუთრებით, მისი სასტიკად ჩახშობის გავლენას ევროპაში მემარცხენე მოძრაობაზე. წიგნში აღწერილია აჯანყების მიმდინარეობა და ჩახშობა და ის გამოძახილი, რომელიც ამ მოვლენებს მოჰყვა ევროპაში. 

წიგნის გამოცემაში გაწეული დახმარებისათვის „ზიარი“ მადლობას უხდის ფრიდრიხ ებერტის ფონდს. 

ერიკ ლი (დ. 1955) არის ამერიკელი მწერალი, ჟურნალისტი და პროფკავშირული აქტივისტი. ერიკ ლიმ ოცდაათი წელი მიუძღვნა საქართველოს ისტორიის სხვადასხვა ასპექტების კვლევას. საქართველოში უკვე გამოცემულია მისი ორი წიგნი: ექსპერიმენტი, საქართველოს მივიწყებული რევოლუცია 1918-1921 (2018) და ქართული ამბოხი ტექსელზე: ბოლო ბრძოლა ევროპაში (2020).