შემიტყუე საწოლში

ამ სათაურის მქონე წიგნს რომ “პატიოსანი” ადამიანი ხელში დაიჭერს, ის, დიდი ალბათობით, 209-ე გვერდზეც გადაშლის და პირველ აბზაცსაც წაიკითხავს. სათაურით და ყდით წიგნს ვინ აფასებს? ეგრე, ერთ წიგნს “იდიოტი” ჰქვია. არა, ზედმეტად ამბიციური პარალელი იყო. რა შეიძლება მოხდეს, თუ ქორწილის წინა დღეს სიძე მოულოდნელად გაუჩინარდება? თუ პატარძალს კარგი მეგობარი ჰყავს, ის გამოსავალს აუცილებლად იპოვის, ხოლო, თუ ის ნამდვილი მეგობარია, შეიძლება გოგონამ ახალ ქმარსაც გამოჰკრას ხელი. არ იფიქრო, რომ ყველაფერი ასე ბანალურად არის. ფართოდ გაახილე თვალები, ღრმად ჩაისუნთქე ჰაერი, იგრძენი შენი ქვეყნის სიდიადე, რომის დიდებულება და პარიზის მიმზიდველობა, დააგემოვნე მსოფლიოში ყველაზე ცნობილი ღვინოები, დატკბი საოცარი თავგადასავლებით თითოეულ გვერდზე და მოემზადე ბევრი სიცილისათვის. გეპატიჟებით ამაღელვებელ, სიყვარულით სავსე და ემოციურ მოგზაურობაში, გამოგვყევი გემრიელი ნაყინებისა და კერძების დასაგემოვნებლად. ეს მხიარული, ძალიან სასაცილო რომანი გიბიძგებს შეცვალო შენი ცხოვრება უკეთესობისკენ, იმოგზაურო და დააფასო სიცოცხლის ყოველი წუთი. დაყარე იარაღი, რომლითაც ცხოვრების რთული ბილიკები უნდა გაკაფო. აქ “სასტატუსე” ციტატებს ვერ ნახავ, ამ წიგნს არ აქვს ამბიცია გასწავლოს ცხოვრება, მისი მიზანია დატოვოს წარუშლელი კვალი შენზე და ფურცლების ნაცვლად შენს გონებაში დარჩეს. თუ მზად ხარ ბევრი სიცილისა და დიდი მხიარულებისათვის შეგიძლია გადაშალო პირველივე გვერდი და არა 209-ე. და კიდევ, თუ ვინმე თვალებს დაგიბრიალებს რას კითხულობო - ეს წარწერა აჩვენე: საწოლში სხვა რაღაცებიც ხდება, მაგალითად, სძინავს ხალხს, ყველას დალხენილი ცხოვრება კი არ აქვს.